Heimilisfang
Velja afhendingarmáta

Komið er út 2. hefti af Tímariti Máls og menningar 2013 þar sem kennir margra grasa að vanda.

Árni Snævarr gerir upp dvöl sína á Stöð tvö í grein sem vekur áleitnar spurningar um eðli fjölmiðla og ábyrgð þeirra sem þá eiga og reka.

Kristrún Heimisdóttir tekur viðtal við Jóhann Pál Árnason heimspeking sem ekki hefur tekið þátt í íslenskri stjórnmálaumræðu áratugum saman enda verið búsettur erlendis. Þau ræða sósíalismann og alræðið; sögu íslenskra sósíalista og þátt Einar Olgeirssonar sérstaklega; fall kommúnismans í Austur-Evrópu sem Jóhann Páll hefur skrifað mikið um og loks ber íslenskra hrunið einnig á góma.

Örn Daníel Jónsson skrifar um heita pottinn í Vesturbæjarlauginni og ýmislegt kringum lauga- og sundmenningu í Reykjavík fyrr og síðar en Úlfhildur Dagsdóttir rekur sögu Medúsuhópsins – þeirra bókmenntalegu villinga úr Breiðholti sem komu með súrrealismann til landsins seint og um síðir og urðu síðar landsþekktir og jafnvel heimsþekktir listamenn.

Þórunn Erlu Valdimarsdóttir skrifar um mörk sagnfræði og skáldskapar og margvísleg álitamál þar, Árni Bergmann fjallar um útópíuna og Halldór Laxness en Magnús Bjarnason, doktor í stjórnmálahagfræði rekur niðurstöður sínar af rannsókn á áhrifum hugsanlegrar ESB-aðildar á hag íslenskra heimila.

Ljóð eru eftir Þóru Jónsdóttur, Véstein Lúðvíksson, Ara Jósefsson (óbirt) og fleiri en sögur meðal annars eftir Bubba Morthens, Sverri Norland og Soffíu Bjarnadóttur. Og er þá fátt eitt talið.

Ritstjóri er Guðmundur Andri Thorsson en áskrift má nálgast í síma 5755600, á netfanginu [email protected], auk þess sem tímaritið fæst í öllum góðum bókabúðum.

2.040 kr.
Afhending