Við hefjum þetta hefti á að bjóða lesendum að rannsaka drauma sína og fylla út eyðublaðið á forsíðunni en eins eyðublað má einnig finna aftast í heftinu. Draumrannsóknin er verk Amöndu Riffo, chilesk-franskrar myndlistarkonu sem hefur búið hér á landi síðustu áratugi og var valin myndlistamaður ársins á Íslensku myndlistarverðlaununum árið 2024. Maó Alheimsdóttir skrifar texta sem kallast á við verk Amöndu, en þær stöllur hafa unnið saman um árabil. Í heftinu leynist fornsöguþema og þar má greina breitt svið; Auður Ingvarsdóttir, sagnfræðingur, skrifar um þjófsaugu Hallgerðar Langbrókar, Kristín Ómarsdóttir birtir ávarp sem hún flutti á Laxdæluþingi og Guðmundur J. Guðmundsson, sagnfræðingur, fjallar um jötna og erótík í Bósa sögu og Herrauðs. MH-ingurinn Lena Charlotta Björnsdóttir er fulltrúi yngri kynslóðarinnar og varpar nýju ljósi á kynhlutverk Njáluhetjanna.

Þá má finna ýmsa gullmola eins og þýðingu Sigurbjargar Þrastardóttur á ljóði ítalska skáldsins Elisu Biagini, sem nýverið dvaldi í Gröndalshúsi, ljóðabálk eftir Brynju Hjálmsdóttur, bréf sem Tómas Ævar Ólafsson sendi nafna sínum og skáldbróður, Tómasi Guðmundssyni, og fjölmargt fleira. Ritdómar um nýlegar bækur eru á sínum stað en einnig birtum við ávarp Ragnars Helga Ólafssonar sem hann flutti við afhjúpun minnismerkis um ljóðlist skáldsins Sigurðar Pálssonar, en nú má lesa nokkrar línur úr mögnuðu ljóði hans, „Stafrófi eldsins“, í gangstéttinni við Tollhúsið í Tryggvagötu.