Þetta tölublað Tímarits Máls og menningar er óvenjulegt að því leyti að það er allt helgað Vigdísi Grímsdóttur og á rót sína í stórafmæli hennar fyrir rúmum tveimur árum. Við fastaritstýrurnar þökkum samstarfið við þær Kristínu Ómarsdóttur og Guðrúnu Steinþórsdóttur sem höfðu veg og vanda af því að safna saman og ritstýra því fjölbreytta og skemmtilega efni sem fyllir heftið að þessu sinni. Þakkir fær líka skáldið Vigdís sem bókmenntaáhugafólk bjóst við svo miklu af þegar hún steig fram á sjónarsviðið fyrir rúmum 40 árum. Við grípum niður í dóm Páls Valssonar í 4. hefti 1986: „Þess eru fá dæmi í seinni tíð að höfundar hafi komið með jafn eftirminnilegum hætti fram á ritvöllinn og Vigdís Grímsdóttir með smásagnasafni sínu Tíu myndir úr lífi þínu. Flestir voru á einu máli um að þar færi gott skáld sem mikils mætti vænta af í íslenskum ritheimi.“ Hún hefur sannarlega staðið undir þeim væntingum!

Efnið um Vigdísi er fjölbreytt – pistlar, ræður, ljóð og smásögur – en höfundar eru Oddný Eir Ævarsdóttir, Kristín Ómarsdóttir, Ásta Björk Sveinbjörnsdóttir, Sigríður Halldórsdóttir, Þórunn Valdimarsdóttir, Gerður Kristný, Jakub Stachowiak, Hanna Óladóttir, Valgerður Ólafsdóttir, Þórdís Filipusdóttir, Ásdís Óladóttir, Guðrún Hannesdóttir, Alda Björk Valdimarsdóttir, Bergþóra Snæbjörnsdóttir, Birta Ósmann Þórhallsdóttir, Eva Rún Snorradóttir, Halla Þórlaug Óskarsdóttir, Haraldur Jónsson, Melkorka Ólafsdóttir, Didda, Ragnar Helgi, Sigurlín Bjarney Gísladóttir, Hólmfríður Sigurðardóttir, Hólmfríður Helga Sigurðardóttir, Olga Guðrún Árnadóttir, Sigurbjörg Þrastardóttir, Kristín Eiríksdóttir, Soffía Bjarnadóttir og Elísabet Jökulsdóttir. Þá eru fjórar lengri greinar um verk Vigdísar eftir þær Bergljótu Kristjánsdóttur, Jórunni Sigurðardóttur, Guðrúnu Steinþórsdóttur og Helgu Jónsdóttur, en einnig má lesa skemmtilegt og fróðlegt viðtal sem gestaritstýrurnar, GS og KÓ, tóku við skáldkonuna VG.