Séra Sturla Bjarnason er kominn inn á hjúkrunarheimili eftir að hafa orðið fyrir slysi undir áhrifum áfengis. Hann er bitur, reiður og þjakaður af sektarkennd. Honum finnst hann hafa brugðist sínum nánustu og sáluhjálpin sem hann hefur veitt sóknarbörnum sínum í gegnum árin hefur ekki friðað samviskuna. Minningarnar sækja á hann, eftirsjá, sorg og leyndarmál sem hafa verið grafin í áratugi. Hann þráir að létta á sálarangist sinni. En hvernig?

Sálarangist er átakanleg saga um eftirsjá og byrðarnar sem við tökum á okkur á ferð okkar í gegnum lífið. Saga um erfiðar ákvarðanir, sekt og áföll, fegurð og ást, líf og dauða.

Rithöfundurinn Steindór Ívarsson hefur vakið mikla lukku meðal lesenda undanfarin ár. Hér snýr hann aftur með heillandi og spennandi örlagasögu, sem er í senn sjálfstætt framhald fyrstu skáldsögu hans, Þegar fennir í sporin, og bókarinnar Sálarhlekkir, sem hittir beint í hjartastað og lætur engan ósnortinn.