„Ég hef þegar sagt henni að í mínum augum séu þau öll saklaus – afi, Fíona, Dídí, pabbi, Rockwell, séra Quinn. Öll sakleysingjar, peð á taflborði almættisins. En þú? spurði hún. Ert þú saklaus?“

Dagur Alfreð Huntingfield fæddist á hurð á norðanverðu Íslandi á fyrri hluta 20. aldar. Bernska hans er viðburðarík, hann flyst út í heim og í lífi hans vegast á ljós og skuggar áður en örlögin leiða hann aftur til Íslands. Eftir sársaukafullt uppgjör rifjar hann upp ótrúlegt lífshlaup sitt til þess að leggja í dóm annarra hvort hann sé sekur eða saklaus. Í þessari áhrifamiklu bók hrífur Ólafur Jóhann Ólafsson lesandann með í magnað ferðalag þar sem sögusviðið er Ísland, England, Indland og Bandaríkin. Um leið og óvenjuleg ævi og örlög Dags Alfreðs eru í forgrunni fléttast inn í líf hans saga margbrotinna einstaklinga – og þeirrar aldar sem nú er að baki.

Sakleysingjarnir eftir Ólaf Jóhann Ólafsson (2004) er stórbrotin saga sem heldur lesanda rammlega föngnum frá upphafi til enda, en hún er jafnframt heillandi frásögn um mannlegan breyskleika, djúpa einsemd, ást, söknuð og mikil örlög.