Kristín heldur svo mörgum boltum á lofti í einu að það er mesta furða að Sirkus Íslands sé ekki búinn að hafa samband. Það er starfsframinn, þrír fjörugir synir og allt sem þeim fylgir, hundur, köttur og auðvitað elskulegur eiginmaðurinn. Sá hagar sér eins og fjórða afkvæmið og lætur henni eftir mestalla ábyrgð á börnum og heimili.

En það kemur að því að kona fær nóg. Eftir vondar fréttir í vinnunni leggur Kristín af stað í óvænta ferð austur á firði til að heimsækja vin sinn og fá næði til að jafna sig og hugsa sinn gang. Þá skýtur fjallmyndarlegur heimamaður upp kollinum.