Kristján H. Magnússon var á meðal athyglisverðustu listamanna þjóðarinnar á fyrri hluta 20. aldar en um hann hefur verið hljótt um áratugaskeið. Hann nam við listaskóla í Bandaríkjunum, ólíkt flestum öðrum Íslendingum á þeim tíma, og varð fyrstur íslenskra myndlistarmanna til að setja upp einkasýningar í erlendum stórborgum. Kristján kom með þá nýjung inn í íslenska landslagsmálverkið að túlka landið markvisst í vetrarbúningi.