Geðleikhús Moreno fjallar um sykódrama en það skilgreinir höfundur sem sjálfstæða listgrein á tvöföldum jaðri, annars vegar í heimi sviðslista og hins vegar innan geðlæknisfræði. Gerð er grein fyrir uppbyggingu vinnulotu í sykódrama, hugmyndafræðinni sem þar liggur að baki og tækninni sem beitt er. Einnig er sagt frá starfsferli Jacobs Levy Moreno sem lagði grunninn að sykódrama og varð með því frumkvöðull í hópmeðferð í geðlækningum.

Geðleikhús Moreno er fyrsta rit sinnar tegundar á íslensku. Bókin brýtur einnig blað í alþjóðlegum rannsóknum á sykódrama þar sem höfundur sýnir fram á að Moreno notfærir sér formgerð fornra vígslusiða um heim allan í uppbyggingu á sykódrama. Auk þess greinir hann frá sláandi líkindum milli niðurstaðna Bessels van der Kolk, höfundar The Body Keeps the Score, á áhrifum vísindalegrar meðferðar áfalla á heilastarfsemi mannsins og hugmyndum Moreno um virkni geðleikhússins.

Trausti Ólafsson var leikhússtjóri Leikfélags Akureyrar um þriggja ára skeið. Hann lauk doktorsprófi í leikhúsfræðum og diplóma-prófi í sykódrama til starfsréttinda í Englandi árið 2003. Síðan hefur hann að staðaldri leitt hópa í geðleikhúsi. Til þess að dýpka skilning á geðleikhúsi segir Trausti í bók sinni stöku brot úr eigin sykódramasögu. Einnig dregur hann upp hliðstæður milli geðleikhússins, fátæks leikhúss Jerzy Grotowski og grimmdarleikhúss Antonins Artaud.

Á undanförnum árum hefur Trausti kennt fjölda námskeiða við Háskóla Íslands og Listaháskóla Íslands. Hann hefur verið leikhúsgagnrýnandi í Víðsjá á Rás 1 frá haustinu 2023.