Um 1864 skrifaði Jónas Helgason danslög niður í litla bók. Jónas, sem var þá 25 ára járnsmiður í Reykjavík, lék reglulega fyrir dansi á fiðlu sína ásamt bróður sínum, Helga Helgasyni. Þetta litla handrit inniheldur um 50 danslög fyrir fiðlu og er varðveitt á Handritasafni Landsbókasafns Íslands – Háskólabókasafns.

Jónas var áhrifamikill tónlistarmaður og stofnaði m.a. söngfélagið Hörpu áður en hann hélt til Kaupmannahafnar þar sem hann nam tónlist. Síðar átti hann eftir að verða dómorganisti, gefa út ótal söng- og tónlistarbækur og kenna fjölmörgun söng og orgelleik.

Fiðluhandrit Jónasar birtist hér í fyrsta sinn á prenti, bæði ljósmyndað og skrifað upp. Í bókinni má finna litmyndir af handritinu í raunstærð, umskriftir allra laganna í nútímanótnasetningu ásamt köflum um skrifarann, dansmenningu Reykjavíkur á 19. öld, dansinn í handritinu, íslenskan dansspilastíl og fleira. Auk umskrifta og ljósmynda er hlekkur á vefsíðu þar sem nálgast má hljóðupptökur allra laganna í bókinni í flutningi Vegar Vårdal, þjóðlagafiðluleikara frá Noregi.

Hér er gerð tilraun til að hefja samtal um íslenskan hljóðfæra- og tónmenningararf sem hefur ekki hlotið nægilega athygli á undanförnum árum, eins og Sigurður Halldórsson, prófessor við tónlistardeild Listaháskóla Íslands komst að orði:

Það er gríðarlegur fengur að Danslög Jónasar komist upp á yfirborðið. Mikið hefur vantað upp á að danstónlist fyrri alda á Íslandi fengi verðuga umfjöllun, ekki síst hljóðfæratónlist, sem okkur hefur nánast verið talin trú um að sé ekki til. Útgáfan er vonandi bara byrjunin á þeirri vegferð að varpa ljósi á þennan mikilvæga hluta tónlistararfsins.