Aha.is hlaut fyrstu Máltækniverðlaunin
Pantaðu matinn með röddinni
Í smáforriti aha.is er hægt að leita að matvöru, veitingum og öðrum vörum með því að tala íslensku við símann eða í gegnum vafrann í tölvunni. Teymi aha.is þróaði lausnina til að bjóða viðskiptavinum sínum betri þjónustu og til að auka aðgengi sem flestra að henni.
Þetta frumkvæði við gerð nýrrar máltæknilausnar var verðlaunað í liðinni viku á ráðstefnu Almannaróms og Samtaka atvinnulífsins, „Tölum um framtíðina“. Þar veitti forseti Íslands, Guðni Th. Jóhannesson, fyrstu Máltækniverðlaunin en þau eru hugsuð sem hvatningarverðlaun fyrir íslensk fyrirtæki og stofnanir til að nýta sér möguleika máltækninnar.
Samfélagsleg skylda íslenskra fyrirtækja
Við afhendinguna sagði Maron Kristófersson, forstjóri aha.is:
„Það er samfélagsleg ábyrgð okkar sem erum að hanna og búa til tækni að gera okkar besta til að skila af okkur betra umhverfi en við komum að - hvort sem það snýr að loftslagsmálum, tungumálum eða öðru. Okkur fannst því sjálfsagt að í hönnun nýs snjallforrits væri íslenska grunnþáttur í þeirri þróun. Þegar við pöntum mat þá getum við núna gert það á íslensku. Það tók okkur kannski tvö, þrjú skipti að venjast því en eftir það tekur þetta svona fimm sinnum styttri tíma en það gerði áður." Hann sagði jafnframt nauðsynlegt að líta til þess að börnin okkar tali ensku við tækin núna, og jafnvel sín á milli á ensku í tölvuleikjum, þó allir séu íslenskumælandi. Þörfin á máltæknilausnum fyrir íslensku væri því aðkallandi.
Ráðstefna um máltækni í atvinnulífi og samfélagi
Hægt er að horfa á ráðstefnuna í fullri lengd hér í spilaranum
Takk fyrir okkur!
Starfsfólk Aha.is þakkar kærlega fyrir verðlaunin og þá viðurkenningu sem okkar vinnu er sýnd með þeim.
