Flokkar:
Höfundur: Kristian Guttesen
Englablóð er níunda ljóðabók höfundar. Í bókinni opnar höfundur sig um þunglyndi og sjálfsvígshugsanir.
Hér eru á ferðinni bæði prósar sem fást við öngþveiti hins mannlega ástands og angurvær ljóð sem láta engan ósnortinn.
Ég tók ákvörðun um að deyja …
Þyngslin lágu á mér, ég gat
hvorki talað né hreyft mig
úr stað, ég starði niður
í hyldýpið sem horfði
til baka og bauð mér inn.
– tíu dögum fyrir jól –
Ég tók ákvörðun og hnýtti
hnút og leitaði mér að krók.
(Skyndilega er það eitthvað
svo hversdagslegt að deyja
og hverfa inn í óminnið).
… og skila mér aftur til skaparans.
Ég leitaði að útgönguleið,
en kallið barst úr lífinu
þegar lítill drengur vaknaði
og með grátkæfðri röddu
rauf dauðaþögnina.