Heimilisfang
Velja afhendingarmáta
Höfundur: Sverrir Norland

Í þremur skáldsögum, ljóðabók og smásagnasafni tvinnar Sverrir Norland saman marglaga ástarbréf til íslenskunnar og listarinnar – og ekki síst listsköpunar á íslensku. Sögusviðið er Evrópa og Bandaríkin og söguhetjurnar leitandi fólk, sem tilheyrir smáþjóð, talar örtungu og lifir í heimi sem verður sífellt samtengdari, rótlausari og alþjóðlegri.

Bókaknippi - allar 5 - Sverrir Norland

Bækurnar eru „Fallegasta kynslóðin er alltaf sú sem kemur næst“, „Hið agalausa tívólí“, „Manneskjusafnið“, „Erfðaskrá á útdauðu tungumáli“ og „Heimafólk“.

Fallegasta kynslóðin er alltaf sú sem kemur næst:
Hópur ungra Íslendinga ákveður að bjarga íslenskum bókmenntum frá dauða og gerir allt sem í sínu valdi stendur til að ná því markmiði.

Hið agalausa tívólí:
Framið er morð á hinu smekklega Kaffi Best í Vesturbænum og tvær seinheppnar lögreglukonur, Elísabet og Lotta, þurfa að taka á honum stóra sínum til að afhjúpa hryllilegan sannleikann. Í ljós kemur að athyglisbrestur hefur náð svo sterkum tökum á samfélaginu að enginn, hvorki lögreglan né almenningur, getur einbeitt sér að málinu – nema yfirmaður morðdeildarinnar, Sverrir Norland, sem flýr í afskekkt kofaskrifli til að fá frið til að hugsa…

Manneskjusafnið:
Manneskjusafnið segir frá tveimur bræðrum, Kornelíusi Páli og Sigvalda Óla, sem missa foreldra sína ungir. Skáldsagan fjallar einkum um hvernig bræðurnir vinna úr sorginni og það hvernig við horfum ólíkum augum á veröldina og höslum okkur þar völl með mismunandi hætti – og hvernig við getum endurskapað alla veröldina í krafti listarinnar.

Erfðaskrá á útdauðu tungumáli:
Erfðaskrá á útdauðu tungumáli er þriðja ljóðabók Sverris Norland. Ljóðtextarnir eru af ýmsum stærðum og gerðum: frjálsir, rímuðir og stuðlaðir, örsögur.

Heimafólk:
Heimafólk geymir sjö sögur sem lýsa fólki sem er rótlaust í alþjóðlegum samtíma. Hver er heimamaður þegar öll landamæri hafa verið máð út af tækni, loftslagsbreytingum og samruna ólíkra menningarheima?