Grand Bateau-vínin eru einhver hagstæðustu kaup í Bordóvínum. Grand Bateau er samstarfsverkefni Château Beychevelle Cru Classé í Saint-Julien og vínmiðlarans [fr. négociant] Maison Barrière.
Heiti vínanna [ís. Mikli bátur] tengist skipinu á miðanum, hinni goðsagnakenndu galeónu Château Beychevelle. Gárungarnir telja að mynd skipsins hafi verið stílfærð til að líkjast kínverskri júnku, til að ganga í augun á viðskiptavinum á Asíumarkaði.
Ch. Beychevelle er mikils metið vínhús og leggur metnað í Grand Bateau-vínin.
Vínunum er ætlað að vera opin og aðgengileg þegar þau koma á markað, með ferskum, skærum ávexti og tilbúin til að njóta með hversdagsmatnum.
Grand Bateau Rouge [ís rautt] er gert úr klassískum Bordóþrúgum, Merlot og Cabernet Sauvignon.
Ilmurinn er opinn og tær með þroskuðum rauðum ávöxtum, plómum, sveskjum og kirsuberjum, kryddi og ögn af nýrri eik [franskri - náttúrulega].
Á gómi er vínið þægilegt og í góðu jafnvægi með mjúkum tónum af þroskuðum ávöxtum sem blómstra með stuðningi nýrrar eikar.
Vínið hefur meðalfyllingu, þroskuð tannín og matarmikið eftirbragð. Tilbúið til að njóta núna en bætir sig trúlega næstu 5 til 6 ár.
Má bera fram eitt og sér sem fordrykk, en er jafnframt dásamlegt með rauðu kjöti (fjallalambi), pasta, pizzu? og ostum.