Fyrsta íslenska bókin sem hafði eingöngu að geyma prósaljóð var Flugur eftir Jón Thoroddsen sem kom út árið 1922. Safnritið Með flugur í höfðinu er yfirlit um íslensk prósaljóð og örsögur, eftir tugi skálda sem hafa fengist við þessi heillandi en vandmeðförnu bókmenntaform. Textarnir eru afar fjölbreyttir, sumt er fyndið og spaugilegt, annað ljóðrænt og angurvært, sumt hvort tveggja, en þeir eiga það sameiginlegt að liggja á mörkum ljóðs og sögu og fá margir spennu sína af því.

Þau Kristín Guðrún Jónsdóttir og Óskar Árni Óskarsson hafa safnað efninu og nálgast verkefnið úr ólíkum áttum. Kristín Guðrún er fræðimaður og hefur fengist við örsögur eftir spænskumælandi höfunda en Óskar Árni er skáld sem hefur ekki síst getið sér gott orð fyrir örsögur og prósaljóð.

Að auki skrifar Kristín Guðrún inngang þar sem hún fer ítarlega í saumana á fræðilegum álitamálum sem varða þessi bókmenntaform og rekur sögu þeirra hér á landi.