Söngleikurinn Hrekkjusvín í Gamla bíói! Glænýr íslenskur gamansöngleikur lítur nú dagsins ljós byggður á hinni geysivinsælu hljómplötu Lög unga fólksins um lífshlaup stórhuga Íslendings! Söngleikurinn er ætlaður fullorðnum, en börn frá 9 ára aldri skemmta sér einnig konunglega. Hér má sjá umfjöllun Kastljósins á söngleiknum

Tónlistarstjóri er Valgeir Guðjónsson sem er jafnframt höfundur flestra laganna. Leikstjórn er í höndum Maríu Reyndal. Verkið er byggt á söngtextum Péturs Gunnarssonar en handritið skrifuðu Guðmundur S. Brynjólfsson, Sveinn Geirsson og Tinna Hrafnsdóttir með dyggri aðstoð leikstjóra og leikhóps. Leikarar og hljómsveit Leikarar eru Atli Þór Albertsson, Hannes Óli Ágústsson, María Pálsdóttir, María Heba Þorkelsdóttir, Orri Huginn Ágústsson, Sveinn Geirsson, Tinna Hrafnsdóttir og Vigdís Gunnarsdóttir. Með þeim á sviðinu verður fimm manna hljómsveit, Valgeir Guðjónsson gítar, Tómas Jónsson píanó, Borgþór Jónsson bassi, Gísli Páll Karlsson trommur og Keith Hayward klarinett.

Árið 1977, fyrir tilstilli Páls Baldvins Baldvinssonar, leiddu saman hesta sína tvær af vinsælustu hljómsveitum áttunda áratugarins, Spilverk þjóðanna og Þokkabót. Afraksturinn varð platan Lög unga fólksins sem af mörgum er talin ein af bestu plötum sem gefnar hafa verið út hérlendis en allir aldurshópar geta haft gaman af henni. Þótt textarnir séu yfir þrjátíu ára gamlir þá er innihald þeirra glettilega "aktúelt" og þeir lýsa á frumlegan og skemmtilegan hátt þjóðfélagsástandi sem á margt sameiginlegt með okkar tíma.

Leikurinn gerist að mestu handan móðunnar miklu þar sem loftkastalasmiðurinn Jóhann Kristinsson heitinn fær tækfæri til að líta yfir farinn veg og skoða misgjörðir sínar með iðrunina að leiðarljósi svo meta megi hver framtíðarvist hans verði, hvort hann fari „upp“ eða „niður“. Jóhann er leiddur í gegnum valda kafla úr lífi sínu og hittir þar fyrir fjölskyldu, vini og annað samferðafólk og upplifir aftur með því grátbroslegar stundir sem hann hefði í mörgum tilfellum viljað að væru gleymdar en ekki geymdar. En hver endastöð Jóhanns verður getur verið snúið að meta þar sem hann er sannur íslenskur bragðarefur og vanur að fara sínar eigin leiðir hvort sem hann er lífs eða liðinn.

Miðasalan er opin: mán. - miðv. kl. 14:00 - 18:00 og fimmt. – sun. 14:00 - 20:00